Raqobat qoʻmitasi 2026-yilda onlayn savdo sohasiga oid 1230 ta shikoyatni qabul qildi

Koʻrsatilgan davrda idora chakana savdo va umumiy ovqatlanish sohasida jami 6414 ta murojaatni qayd etgan boʻlib, ularning 19,2 foizi onlayn segment hissasiga toʻgʻri kelgan. Elektron tijoratdagi arizalarning yarmidan koʻpi Uzum ekotizimiga tegishli boʻldi: 446 ta shikoyat (36,2%) Uzum Marketʼga va 184 tasi (14,9%) Uzum Nasiya muddatli toʻlov xizmatiga kelib tushgan. Shuningdek, Alif Shop (92 ta yoki 7,5%), Ishonch tarmogʻi (69 ta yoki 5,6%) va Yandex xizmatlari (63 ta yoki 5,1%) boʻyicha ham murojaatlar qayd etilgan.

Qoʻmita maʼlumotlariga koʻra, 57,2% holatda (704 ta murojaat) qarorlar fuqarolar foydasiga qabul qilinib, ularning huquqlari toʻliq tiklangan. 453 ta ariza (36,8%) boʻyicha isteʼmolchilarga yuridik maslahatlar berilgan, 33 ta murojaat (2,7%) esa boshqa tegishli idoralarga yuborilgan.

Murojaatlar asosida regulyator sohaning tizimli muammolarini ajratib koʻrsatdi: sotuvchilarni identifikatsiya qilish, maʼlumotlarning shaffofligi, elektron shartnomalar va muddatli toʻlovlarni rasmiylashtirish tartibi, logistika, mablagʻlarni qaytarish, shuningdek, platformalar masʼuliyatini oshirish va nizolarni sudgacha raqamli hal etishni joriy qilish.