Toshkentda Lutfiy koʻchasida ajratilgan tasmalar nazorati kameralari ishga tushdi

Ushbu hudud poytaxtning Chilonzor tumanida joylashgan. Bu yerda yoʻlning oʻng chetida jamoat transporti uchun moʻljallangan "A" tasmasi, uning yonida esa velosipedchilar, elektrosamokat va boshqa individual harakatlanish vositalari foydalanuvchilari uchun alohida tasmalar tashkil etilgan.

Tizim begona mashinalarning ushbu tasmalarda harakatlanishi, toʻxtashi yoki qoidalarni buzgan holda turishi holatlarini qayd etadi. Kameralar tomonidan qayd etilgan toʻxtash va toʻxtab turish qoidalarini buzish holatlari uchun jarimalar qonunchilikda belgilangan tartibda rasmiylashtiriladi. Yoʻl harakatini tashkil etish markazida haydovchilarni belgi va chiziqlarga amal qilishga hamda avtobuslar, velosipedchilar va samokatchilar uchun ajratilgan tasmalarni egallamaslikka chaqirishdi.

Poytaxtda ajratilgan tasmalardagi kameralar bosqichma-bosqich joriy etilmoqda. Lutfiy koʻchasidan oldin bunday nazorat Fargʻona yoʻli koʻchasida paydo boʻlgan boʻlib, u yerda ikki yoʻnalishda 6 km masofani qamrab oladi.