Uzbekistan Airports va Krasnoyarsk aeroporti yangi reyslarni muhokama qildi

Krasnoyarsk aeroporti bosh direktori Kirill Yermakov boshchiligidagi delegatsiya bilan oʻtkazilgan muzokaralar Fargʻonadagi Rossiya-Oʻzbekiston forumida boshlangan muloqotning davomi boʻldi. Tomonlar Krasnoyarskdan Samarqand va Fargʻonaga boʻlgan yoʻnalishlarga, shuningdek aviakompaniyalarni jalb qilish imkoniyatlariga alohida eʼtibor qaratdi.

Toʻgʻridan-toʻgʻri reyslardan tashqari, uchrashuv ishtirokchilari tutash (tranzit) parvozlarni rivojlantirishni koʻrib chiqdi. Xususan, Fargʻona Istanbul yoʻnalishlari uchun, Samarqand esa Dubay va Tel-Aviv reyslari uchun qayta oʻtish (transfer) punkti vazifasini bajarishi mumkin. Krasnoyarsk aeroporti Oʻzbekistondan Xitoy shaharlari hamda Rossiyaning Uzoq Sharqiga yoʻl oladigan yoʻlovchilar uchun ehtimoliy tranzit tuguni sifatida koʻrilmoqda.

Muzokaralar yakunida tomonlar istiqbolli yoʻnalishlarni va tashuvchilarni jalb qilish masalasini birgalikda ishlab chiqishga kelishib oldi. Shuningdek, yoʻnalishlarni targʻib qilish hamda yoʻlovchilar oqimini ragʻbatlantirish maqsadida aviakompaniyalar va turizm sohasi vakillari ishtirokida qoʻshma marketing loyihalarini amalga oshirish rejalashtirilmoqda.