Toshkentdagi Fargʻona yoʻli koʻchasida “Yashil toʻlqin” ishga tushirildi

Mazkur koridor Qoʻyliq koʻprigidan keyingi “Qoʻyliq ota” maqbarasidan to OʻzBUMgacha boʻlgan oraliqni qamrab oladi va kechayu kunduz ishlaydi. Mutaxassislar oʻlchovlariga koʻra, tigʻiz boʻlmagan vaqtlarda ushbu qismdan oʻtish avvalgi 12–13 daqiqa oʻrniga endi taxminan 9 daqiqa vaqt olmoqda, bu esa yoʻl vaqtini qariyb 25 foizga qisqartirdi.

Hokimlikda tushuntirilishicha, svetoforlar hisoblangan harakat tezligiga rioya qilingan holda sinxron ishlashga sozlangan. Bu haydovchilarga ruxsat beruvchi ishora orqali maksimal darajada koʻp chorrahalardan oʻtish, toʻxtashlar sonini kamaytirish va transport oqimini bir maromda saqlash imkonini beradi. Sozlash ishlari shahar aholisining murojaatlaridan soʻng amalga oshirildi.

Yoʻl harakatini tashkil etish markazi mutaxassislari Fargʻona yoʻli koʻchasidagi vaziyatni kechayu kunduz monitoring qilishni davom ettirmoqda va zarur hollarda svetoforlar rejimiga tuzatishlar kiritib boradi.