“Sobir Rahimov” va “Oʻrtaovul” stansiyalari oraligʻida yangi yoʻl oʻtkazgich ochildi

Obyektning ochilish marosimi 3-oktabr kuni boʻlib oʻtdi. Inshoot Toshkent shahri va Toshkent viloyati tutashgan joyda, 3384-kilometrda (PK-2) joylashgan sobiq oʻtish joyida transport oqimlarini tartibga solish maqsadida qurildi. Tadbirda Toshkent viloyati hokimi Z. Mirzayev, “Oʻzbekiston temir yoʻllari” rahbari Z. Narzullayev va transport prokurori I. Narimov ishtirok etdi.

Loyiha doirasida uzunligi 23,6 metr boʻlgan ikki yoʻlli temiryoʻl koʻprigi qad rostladi, yoʻllar esa loyihaviy holatiga qaytarildi. Shuningdek, umumiy uzunligi 1200 metr boʻlgan aylanma temiryoʻl tarmogʻi va avtomobil yoʻli barpo etildi, 800 metr kontakt tarmogʻi toʻliq qayta yotqizildi. Toʻsiq devorlari poydevori uchun quruvchilar 237 ta burgʻulab quyma svay oʻrnatdilar va 11 ming kub metrdan ortiq betondan foydalandilar.

Umumiy yer ishlari hajmi 60 ming kub metrga yetdi. Obyektda suv oʻtkazish tizimlari, jumladan, yomgʻir va erigan suvlar uchun ikkita suv chiqarish quvuri oʻrnatildi, shuningdek, avtomobil va piyodalar yoʻlaklari yotqizildi.