OnePlus 15 va Oppo smartfonlari Android 17 yangilanishini muddatidan oldin ola boshladi

Hozircha dasturiy taʼminotni Hindistondagi OnePlus 15 egalari olmoqda, yigʻma raqami — CPH2745_17.0.0.102(EX01). Beta-sinov ishtirokchilari qariyb 540 MB, qolganlar esa 3,5 GB dan ortiq maʼlumot yuklab olishlari kerak. Kod.ru nashrining 9to5Googleʼga tayanib xabar berishicha, Hindistonda yangilanish OnePlus Pad 4 planshetiga ham kelgan. Oʻsha maʼlumotlarga koʻra, barqaror versiyani 22–23-oktabr kunlari partiyalar shaklida tarqata boshlashgan, shu sababli u hozircha hamma uchun mavjud emas.

Oppo modellaridan Find X9, Find X9 Pro, Find X9 Ultra, Find X9s va buklanuvchi Find N6 yangilanishni oldi. Tarqatish bosqichma-bosqich amalga oshirilmoqda: koʻpchilik modellar Hindiston, Indoneziya va Malayziyada, Find N6 esa Tailandda yangilanmoqda.

Bunda OnePlus qurilmalari OxygenOS tizimidan ColorOS 17 tizimiga oʻtmoqda. Kod.ru nashri 9to5Google maʼlumotiga tayanib, yozda OnePlus global operatsiyalarini qisqartirganini eslatadi. Oʻshanda kompaniya ishlab chiqarilgan smartfonlar vaʼda qilingan yangilanishlarni olishda davom etishini, biroq endi ColorOS asosida boʻlishini eʼlon qilgan edi.

Shu maʼlumotlarga koʻra, keyingi toʻlqin 30-oktabrga moʻljallangan: OnePlus 15R, OnePlus 13 va OnePlus 13s. Noyabr oyida navbat OnePlus Open, OnePlus 13R, OnePlus 12 hamda Nord va Pad modellarining bir qismiga yetib boradi. Jami 24 ta qurilma uchun Android 17 vaʼda qilingan. Eng oxirgi boʻlib, 2027-yilning birinchi choragida, jumladan OnePlus Nord 4, N6 seriyasi va OnePlus Pad Lite yangilanishi kerak.