"Yandeks" MBKlariga qilingan hujumlardan soʻng Yandex Cloud maʼlumotlarining 90,47 foiziga kirishni tikladi

Kompaniya maʼlumotlarning bir qismini va ular bilan bogʻliq servislarni 23-oktabrdan ish boshlagan yangi maydonga koʻchirdi. Ularga kirish imkoniyati yaqin kunlarda bosqichma-bosqich ochiladi, mijozlar esa bu haqda Yandex Cloud xabarnomasi orqali bilib oladi. Asosiy funksiyalar allaqachon ishlamoqda: virtual mashinalar va maʼlumotlar bazalarini yaratish, Kubernetes klasterlarini boshqarish, biznes-tahlil, kiberxavflardan himoyalanish va Yandex AI Studio vositalari. Qolgan maʼlumotlar va servislar hali ham tiklanmoqda.

"Yandeks 360" matbuot xizmati "Yandeks Disk"dagi fayllarning mavjudligi kundan-kunga oshib borayotganini maʼlum qildi. Jamoaning soʻzlariga koʻra, hujjatlarni oldindan koʻrish imkoniyati qaytdi, kompyuter ilovasida yuklab olish va sinxronizatsiya qilishdagi bir qator xatolar tuzatildi, biroq foydalanuvchilarning bir qismi hamon fayllarga kirishda qiyinchiliklarga duch kelmoqda.

Nosozliklar kompaniyaning maʼlumotlarni qayta ishlash markazlariga qilingan hujumlardan soʻng yuzaga keldi. Vladimir shahridagi obyektga 11-oktabrga oʻtar kechasi hujum qilingan, yana ikkita maʼlumotlar markazi avvalroq dronlar hujumidan zarar koʻrgan edi; Kod.ru maʼlumotlariga koʻra, gap Ryazan viloyati va Kalugadagi maydonlar haqida bormoqda. Rossiya Raqamli rivojlanish vazirligi rahbari Maksut Shadayev vazirlik kompaniyaga asosiy tizimlar koʻchirilgan qoʻshimcha quvvatlarni topishda yordam berganini bildirdi. Kompaniyaning strategik marketing boʻyicha direktori Andrey Sebrant nosozlik oʻquv-mashgʻulotlarida koʻrib chiqilgan bitta maʼlumotlar markazini yoʻqotish ssenariysidan koʻra jiddiyroq boʻlib chiqqanini avvalroq taʼkidlagan edi.