The Browser Company 2026-yil 22-dekabrda Arc brauzerini yopadi

Kompaniya Arcʼdan voz kechishni xavfsizlik bilan bogʻlamoqda. Uning maʼlum qilishicha, Dia dastlab zamonaviy himoya talablarini inobatga olgan holda loyihalashtirilgan, shu sababli endilikda muhandislar va xavfsizlik mutaxassislari faqat unga eʼtibor qaratishadi. "Brauzer xavfsiz boʻlib qolishi uchun doimiy ish talab etiladi va sunʼiy intellekt davrida bu ishlar yanada koʻpaymoqda", — deyiladi kompaniya bayonotida.

Yopilish jarayoni uch bosqichda amalga oshiriladi. 22-oktabrdan boshlab Arcʼda yangi akkauntlar roʻyxatdan oʻtkazilmaydi, soʻnggi versiyada esa barcha maʼlumotlarni eksport qilish funksiyasi paydo boʻldi. 23-noyabrda iOS va Android uchun mobil Arc Search ilovasida Browse for Me va sunʼiy intellektga asoslangan boshqa funksiyalar, shuningdek, akkauntga kirish hamda vkladkalarni sinxronlash oʻchirib qoʻyiladi. Ilova brauzer boʻlib qoladi: iOSʼda soddalashtirilgan shaklda, Androidʼda esa 22-dekabrgacha. Ushbu sanada macOS va Windows uchun ish stoli versiyalari ishlashdan toʻxtaydi, akkauntlar faolsizlantiriladi, shaxsiy maʼlumotlar esa 30 kun ichida oʻchirib yuboriladi. Android uchun Arc Search Google Play va qurilmalardan yoʻqoladi.

Diaga oʻtilganda parollar, xatchoʻplar, tarix, kengaytmalar va vkladkalar koʻchiriladi. Boʻshliqlar (Spaces) profillarga, papkalar esa vkladkalar guruhlariga aylanadi, shuningdek, vertikal vkladkalar bilan yon panel ham mavjud. Kompaniya Arcʼdan tanish boʻlgan funksiyalar Diaʼda bepul ekanini va sunʼiy intellektdan foydalanish majburiy emasligini taʼkidlamoqda. Oʻtishni rejalashtirmaganlarga 22-dekabrgacha Arc sozlamalari orqali vkladkalarni havolalar roʻyxati koʻrinishida eksport qilish taklif etilmoqda.

Kompaniya 2025-yilda Diaga oʻtishi sababli Arc uchun yangi funksiyalarni chiqarishni toʻxtatgan edi; oʻsha yili uni Atlassian 610 million dollarga sotib oldi. Xabr qayd etishicha, 2025-yilning may oyida kompaniya hammuassisi Josh Miller Arc yopilmasligini ommaviy ravishda maʼlum qilgan edi.