Sony Yaponiyada soʻnggi UHD Blu-ray pleyerining sotuvini toʻxtatdi

Sony kompaniyasining Yaponiya saytida qurilma sotuvda yoʻq deb belgilangan va u yerda koʻrsatilishicha, yangi yetkazib berishlar kutilmayapti. Kompaniya global press-reliz chiqarmadi, modelning vorisi haqida xabar berilmadi. FlatpanelsHD maʼlumotlariga koʻra, AQSh, Yevropa va boshqa mintaqalarda UBP-X700/K rasman hozircha ishlab chiqarishdan olingani yoʻq.

Model 2025-yil may oyida paydo boʻlgan va 2018-yilgi UBP-X700 ning soddalashtirilgan varianti edi: undan oʻrnatilgan striming ilovalari, jumladan YouTube olib tashlangan, biroq 4K Ultra HD Blu-ray, HDR10, Dolby Vision, Dolby Atmos va DTS:X qoʻllab-quvvatlovi qoldirilgan edi. Sotuvdan olinishidan oldin pleyer 58 300 iyen turar edi.

Yaponiyadagi Sony qurilmalari orasida endilikda faqat disk yuritgichli PlayStation 5 UHD Blu-ray disklarini oʻqiy oladi, biroq disklarni ijro etishda konsol Dolby Visionʼni qoʻllab-quvvatlamaydi. Sotuvda oddiy Blu-ray uchun BDP-S1700/K pleyeri va bitta DVD-pleyer modeli qolmoqda. Avvalroq Sony alohida CD va SACD pleyerlari bozoridan chiqqan, 2026-yil fevralida esa Blu-ray rekorderlarini yetkazib berishni toʻxtatishini eʼlon qilgan edi. Kompaniya, shuningdek, 2028-yil yanvaridan jismoniy oʻyin tashuvchilarini ishlab chiqarishni toʻxtatishini ham bildirdi.

Yirik elektronika brendlari orasida faqat Panasonic UHD Blu-ray pleyerlarini sotishda davom etmoqda; ushbu bozorga yangi, asosan Xitoy ishlab chiqaruvchilari ham kirib kelmoqda.