YouTube odatiy videolar ostidagi dizlayk tugmasini menyuga koʻchirishni sinovdan oʻtkazmoqda

Android Authority manbasiga tayangan holda Kod.ru yozishicha, X va Reddit foydalanuvchilari yangi variant tomoshabinlarning bir qismida taxminan ikki hafta oldin paydo boʻlganini maʼlum qilmoqda. «Yoqdi» belgisi avvalgidek video ostida qolgan, dizlayk qoʻyish uchun esa endi shikoyat qilish kabi boshqa amallar ham toʻplangan qoʻshimcha menyuni ochish kerak boʻladi. Habr havola qilgan 9to5Google portali esa ayrim foydalanuvchilarda dizlayk tugmasi umuman yoʻqligini yozmoqda.

Tomoshabinlarning koʻpchiligida interfeys hozircha oʻzgarmagan, sinov qanchalik keng miqyosda ketayotgani esa nomaʼlum. YouTube yangilikni rasman eʼlon qilmadi, Googleʼda oʻzgarishlarga izoh berilmadi.

Google iyun oyidayoq Shortsʼdan dizlaykni olib tashlash va uni boshqa shakldagi fikr-mulohaza bilan almashtirish rejalarini bildirgan edi. Oʻshanda kompaniya shunday aniqlik kiritgandi: «Uzun videolar va jonli efirlar uchun dizlayklar avvalgidek odatiy tartibda hisobga olinishda davom etadi». Salbiy baholar hisoblagichini platforma hali 2021-yildayoq mualliflarni taʼqiblardan himoya qilish bilan izohlab, tomoshabinlardan yashirgan edi; mualliflarning oʻzlari esa dizlayklar sonini hozirga qadar koʻra oladi.