300 mingta IT ish oʻrni maqsadi muddatidan oldin bajarildi, yangi marra — yana 500 mingta

Endi 2030-yilga kelib raqamli iqtisodiyotning yangi yoʻnalishlari hisobiga qoʻshimcha 500 ming ish oʻrni yaratish zarur. Matbuot xizmati maʼlumotlariga koʻra, buning uchun oʻqish va koʻnikmalarni tasdiqlashdan tortib ishga joylashishgacha boʻlgan butun yoʻlni qamrab oluvchi yagona raqamli taʼlim ekotizimi talab etiladi. Taqdimotda 2030-yilgacha anʼanaviy va masofaviy shaklda 5,5 million yoshlarni oʻqitish rejalashtirilgan yondashuvlar muhokama qilindi.

Davlat rahbari har yili robototexnika, kompyuter oʻyinlarini yaratish, startaplar va boshqa istiqbolli yoʻnalishlar boʻyicha 1 million yoshlarni tayyorlash vazifasini qoʻydi. Maktab oʻquvchilari uchun «Al-Xorazmiy vorislari» hamda «Besh million sunʼiy intellekt yetakchisi» loyihalarini kengaytirish rejalashtirilmoqda. Fargʻona tajribasiga tayangan holda iOS-dasturchilarni tayyorlash markazlarini ochish va xususiy oʻquv markazlari uchun mentorlarni oʻqitish boʻyicha takliflar maʼqullandi. OTMlarga sunʼiy intellekt, mikrosxemalarni loyihalash, uchuvchisiz texnologiyalar va oʻyinlar ishlab chiqish sohasida kadrlarni tayyorlashni rivojlantirish taklif etildi.

2025-yilda raqamli taʼlimga 22 million dollar miqdorida grant mablagʻlari jalb etildi. 2026-yil oxiriga kelib maqsadli hajm 60 million dollarni, 2030-yilga kelib esa 100 million dollarni tashkil etadi. Joriy yilgi mablagʻlarning yarmi bevosita raqamli taʼlimga, ikkinchi yarmi esa malaka oshirishga, shuningdek, chekka hududlarda dasturlash, robototexnika va sunʼiy intellekt bilan shugʻullanish uchun markazlarni ochish va jihozlashga yoʻnaltiriladi.

Shuningdek, «Raqamli yoshlar» platformasi boʻyicha rejalar koʻrib chiqildi. Rejaga koʻra, unda yoshlarning taʼlimi, koʻnikmalari, til bilishi va sertifikatlari haqidagi maʼlumotlar jamlanadi, platformaning oʻzi esa boʻsh ish oʻrinlarini tanlashda koʻmaklashadi va ishga joylashish hisobini yuritadi.