Ishqibozlar Redmi smartfonlarida iOS 16 tizimini ishga tushirdi

Loyihalar ios-sweet va ios-topaz nomlarini oldi. Sohaviy nashrlarning xabar berishicha, ishning asosida ochiq Apple XNU yadrosining moslashuvi yotadi, uning ustiga esa iPhone X proshivkasi komponentlari (xususan, iOS 16.7.16) ishga tushiriladi. Shu bilan birga qurilmalarda Android ishlatilmaydi.

Snapdragon 732G chipiga ega Redmi Note 10 Pro uchun dipa-studio tomonidan taqdim etilgan ios-sweet loyihasida jismoniy tugmalar va sensorli ekran ishlamoqda. Smartfonda sozlamalar, boshqaruv punkti, bildirishnomalar markazi va baʼzi oʻrnatilgan ilovalarga oʻtish mumkin, biroq bosh ekranga qaytish ishorasi (jest) ishlamaydi. Snapdragon 685 protsessorli Redmi Note 12 4G qurilmasida (dasturchi MakrSasning ios-topaz loyihasi) tizim uch daqiqa ichida faqat blokirovka ekranigacha yetib boradi. Ushbu modelda sakkizta yadrodan faqat toʻrttasi faol, chunki qolganlari iOS talab qiladigan 16 kilobaytlik xotira sahifalarini qoʻllab-quvvatlamaydi.

Ikkala qurilmada ham videodrayverlar yoʻqligi sababli grafika uchun markaziy protsessor javob beradi, bu esa kadrlar chastotasini pasaytiradi. Smartfonlarda shuningdek uyali aloqa, Wi-Fi, Bluetooth modullari, ovoz, datchiklar, kameralar va GPS ishlamaydi, Apple ID va App Store xizmatlari esa oʻchirilgan. Ios-topaz loyihasi muallifi materiallarni GitHubʼga joylashtirdi hamda xuddi shu apparatda Windows tizimini ishga tushirish boʻyicha ishlanmalardan koʻchirib oʻtkazish orqali grafika va ovoz drayverlarini qoʻshishni rejalashtirmoqda.