300 ming IT-ish oʻrni maqsadi muddatidan oldin bajarildi, yangi marra — yana 500 ming

Endilikda 2030-yilga borib raqamli iqtisodiyotning yangi yoʻnalishlari hisobiga qoʻshimcha 500 ming ish oʻrni yaratish lozim. Matbuot xizmati maʼlumotlariga koʻra, buning uchun oʻqish va koʻnikmalarni tasdiqlashdan tortib ishga joylashishgacha boʻlgan butun yoʻlni qamrab oluvchi yagona raqamli taʼlim ekotizimi zarur. Taqdimotda 2030-yilgacha anʼanaviy va masofaviy shaklda 5,5 million yoshlarni oʻqitish rejalashtirilgan yondashuvlar muhokama qilindi.

Davlat rahbari har yili 1 million yoshlarni robototexnika, kompyuter oʻyinlari yaratish, startaplar va boshqa istiqbolli yoʻnalishlar boʻyicha tayyorlash vazifasini qoʻydi. Maktab oʻquvchilari uchun «Al-Xorazmiy vorislari» va «Besh million sunʼiy intellekt yetakchisi» loyihalarini kengaytirish rejalashtirilmoqda. Fargʻona tajribasiga tayangan holda iOS-dasturchilarni tayyorlash markazlarini ochish hamda xususiy oʻquv markazlari uchun mentorlarni oʻqitish takliflari maʼqullandi. OTMlarga sunʼiy intellekt, mikrosxemalarni loyihalash, uchuvchisiz texnologiyalar va oʻyinlar ishlab chiqish sohalarida kadrlar tayyorlashni rivojlantirish taklif etildi.

2025-yilda raqamli taʼlimga 22 million dollar miqdorida grantlar jalb etishga erishildi. 2026-yil oxiriga kelib maqsadli hajm 60 million dollarni, 2030-yilga borib esa 100 million dollarni tashkil etadi. Bu yilgi mablagʻlarning yarmi bevosita raqamli taʼlimga, ikkinchi qismi esa malaka oshirishga, shuningdek, chekka hududlarda dasturlash, robototexnika va sunʼiy intellekt bilan shugʻullanish uchun markazlarni ochish va jihozlashga yoʻnaltiriladi.

Shuningdek, «Raqamli yoshlar» platformasi boʻyicha rejalar koʻrib chiqildi. Rejaga koʻra, unda yoshlarning taʼlimi, koʻnikmalari, til bilishi va sertifikatlari haqidagi maʼlumotlar jamlanadi, platformaning oʻzi esa boʻsh ish oʻrinlarini tanlashda koʻmaklashadi va bandlik hisobini yuritadi.