Meta Muse Wonder va Wonder Full sunʼiy intellekt modellarini taqdim etdi

Har ikkala yopiq model uzoq muddatli agentlik ssenariylariga moʻljallangan boʻlib, ularning doirasida tizim dasturlash, hujjatlar bilan ishlash va shaxsiy moliya kabi koʻp bosqichli foydalanuvchi vazifalarini avtonom tarzda hal qiladi. Yangi modellarda muloqotlar oʻrtasida kontekstni saqlab qolish uchun Active Memory hamda xatolarga moslashish va vazifa ustida ishlashni davom ettirish uchun Active Focus funksiyalari joriy etilgan. Tizimlarni oʻqitish Muse Spark arxitekturasi asosida quvvati qariyb bir gigavatt boʻlgan Prometheus maʼlumotlar markazida olib borildi.

Meta’ning ichki benchmarklariga koʻra, dasturiy taʼminotni ishlab chiqish vazifalarini hal qilish boʻyicha DeepSWE 1.1 sinovida Wonder Full modeli 79 ball toʻplab, Claude Opus 5.5 (74,2) va GPT-6 Astra (74,1) modellaridan oʻzib ketdi. SWE-Marathon testida katta model Opus 5.5 dagi 46,3 va Astra dagi 42,5 ga nisbatan 57,5 ball toʻpladi. Shu bilan birga, Artificial Analysis Intelligence Index mustaqil reytingida Muse Wonder Full 58 ball toʻplagan Claude Opus 5.5 ga 56 ball bilan imkoniyatni boy berdi, biroq GPT-6 Astra (53 ball) modelidan oʻzib ketdi.

Bazaviy Muse Wonder modelidan foydalanish imkoniyati Meta Model API va dasturchilar uchun Muse Code xizmati orqali ochilgan. Katta Muse Wonder Full modeli esa Muse Code obunachilariga taqdim etiladi. Kelgusida Meta ushbu yangilikni Muse yordamchisiga integratsiya qilishni rejalashtirmoqda, dastlab undan foydalanish imkoniyati pullik obunachilarga ochiladi.