Google 180 dollarlik Fitbit Edge fitnes-bilaguzugini taqdim etdi

Qurilma Gorilla Glass 3 himoya oynasiga ega boʻlgan 1,34 dyuymli choʻziq AMOLED-displey bilan jihozlangan. Alyuminiy korpus IP68 va 5 ATM standartlari boʻyicha namlik hamda changdan himoyalangan, bilaguzukning tasmasiz ogʻirligi esa 17,7 grammni tashkil etadi. Fitbit Charge 6ʼdan farqli ravishda, yangi modelda Google Wallet orqali kontaktsiz toʻlovlarni amalga oshirish uchun NFC moduli mavjud emas.

Kompaniya maʼlumotlariga koʻra, oʻrnatilgan GPS Charge 6ʼga nisbatan 40% aniqroq boʻldi. Gadjet puls, teri harorati, qondagi kislorod darajasi (SpO2) datchiklari, altimetr, EKG olish ilovasi va 50 dan ortiq mashgʻulot rejimlarini qoʻllab-quvvatlash imkoniyatiga ega boʻldi. Gemini asosidagi Google Health Coach shaxsiy murabbiy funksiyasi pullik Google Health Premium obunasi mavjud boʻlganda Google Health ilovasi orqali ishlaydi.

Akkumulyator Always-on Display doimiy ekranni yoqish rejimi oʻchirilganda yetti kungacha, u faollashtirilganda esa taxminan ikki sutkagacha avtonom ishlashni taʼminlaydi. Batareya almashtiriladigan hisoblanadi, biroq ishlab chiqaruvchi mustaqil taʼmirlash texnik koʻnikmalarni talab qilishidan ogohlantiradi. Shuningdek, bilaguzukning narxi 219,99 dollar boʻlgan maxsus Stephen Curry Edition versiyasi ham koʻzda tutilgan.