Volkswagen yangi ID. Tiguan elektr krossoverini taqdim etdi

Brend bosh direktori Tomas Sheferning maʼlum qilishicha, yangilik ikkita muvaffaqiyatli yoʻnalishni birlashtirishga qaratilgan: brendning dunyodagi eng koʻp sotiladigan avtomobili boʻlgan Tiguan hamda ID. 4 va ID. 5 elektromobillar qatori. Model modernizatsiya qilingan MEB+ platformasiga asoslangan. Yevropada elektr krossoverga oldindan buyurtma berish 2026-yil 13-oktabrda ochiladi, boshlangʻich narxi esa 42 695 yevroni tashkil etadi. Xaridorlarga mashinalarni ilk yetkazib berish 2027-yil boshiga moʻljallangan.

Elektromobil 58 va 77 kVt·soat sigʻimli batareyalar bilan taklif etiladi, ular WLTP sikli boʻyicha 600 km gacha masofani taʼminlaydi. Boshlangʻich modifikatsiya 187 ot kuchiga ega dvigatel bilan jihozlangan. 77 kVt·soatlik batareyaga ega oraliq versiya 281–282 ot kuchini beradi, toʻliq gʻildirakli ikki motorli ID. Tiguan 4MOTION versiyasi esa umumiy 295 ot kuchi quvvatiga ega boʻldi. Avtomobil tortuvchi batareya sigʻimiga qarab 1800 yoki 2000 kg gacha ogʻirlikdagi tirkamani tortishga qodir.

Mashinaning uzunligi 4618 mm, gʻildirak bazasi esa 2765 mm ni tashkil etadi. Asosiy yukxona hajmi 534 litrga yetadi, kapot ostida esa qoʻshimcha 32 litrli boʻlma ham mavjud. Interyerda ishlab chiqaruvchi rul va iqlim nazorati blokidagi jismoniy tugmachalarni qaytardi, 15 dyuymli multimedia tizimi displeyini va shkalalari retro-uslubda bezatilgan 10 dyuymli raqamli asboblar panelini oʻrnatdi. Avtoishlab chiqaruvchi, shuningdek, krossoverni AQSH va Kanada bozorlariga chiqarishni ham rejalashtirmoqda.