Apple va LG aqlli uy uchun birgalikdagi qurilmalar qatorini tayyorladi

Yangi qatorga videoqoʻngʻiroq, aqlli eshik qulfi, xona termostati, yordamchi harorat datchigi, koʻcha va xonalar uchun kuzatuv kameralari, shuningdek, oʻrnatilgan projektorli kamera kiradi. Texnikani ishlab chiqarish va unga servis xizmati koʻrsatish bilan LG shugʻullanadi, Apple esa muhandislik qismi, funksiyalari va tashqi koʻrinishini yaratishda ishtirok etdi. Har ikki kompaniya rasmiy izoh berishdan bosh tortdi.

Texnika Wi-Fi va Bluetooth simsiz interfeyslari, Matter va Thread standartlari qoʻllab-quvvatlashi, shuningdek, Apple aqlli uy ekotizimi bilan muvofiqlikka ega boʻldi. Eshik qulfiga smartfon yoki taqiladigan gadjet bilan yaqinlashganda kirish eshigini ochish imkonini beruvchi oʻta keng polosali aloqa (UWB) texnologiyasi integratsiya qilingan.

LG ushbu qurilmalarni sertifikatlashtirish uchun AQSH Federal aloqa komissiyasi (FCC) va UL Solutions tashkilotiga arizalar yuborib boʻldi. Qurilmalarning bozorga chiqarilishi bir necha oydan keyin kutilmoqda: ishlab chiqaruvchi regulyatordan qurilmalarning fotosuratlari va batafsil xususiyatlarini kelgusi yilning boshigacha oshkor qilmaslikni soʻradi.