Qualcomm va Huawei 5G hamda SI patentlari boʻyicha kelishuv tuzdi

Shartnoma har ikki tomonning patent portfellaridan oʻzaro foydalanishni koʻzda tutadi. Bundan tashqari, Qualcomm kompaniyasi Huaweiʼdan hisoblash, SI va maʼlumotlarni uzatish texnologiyalariga oid AQShda roʻyxatdan oʻtkazilgan muayyan patentlarni sotib oladi. Kompaniyalar oʻrtasidagi kelishuv ilk bor 5G avlodi texnologiyalarini qamrab olmoqda. Shu bilan birga, Qualcomm Xitoy kompaniyasidan LogicFolding texnologiyasini litsenziyalash haqidagi xabarlarni rad etdi.

Tomonlar ushbu bitimning moliyaviy parametrlarini oshkor qilmay, hamkorlik intellektual mulk masalalari bilan cheklanishini qayd etishdi. Huawei kompaniyasining intellektual mulk boʻyicha bosh mutaxassisi Alan Fan kelishuv kompaniya innovatsiyalarining qadr-qimmatini aks ettirishini va Qualcommʼning zamonaviy kommunikatsiyalarga qoʻshgan hissasini eʼtirof etishini taʼkidladi.

Imzolangan kelishuvni hisobga olgan holda, Huaweiʼning litsenziyalash boʻyicha shartnomalarining umumiy summasi 2011-yildan beri 6,9 milliard dollardan oshdi. Xitoy kompaniyasi maʼlumotlariga koʻra, 2025-yil oxiriga kelib uning global patent portfeli 165 mingdan ortiq amaldagi patentni tashkil etgan, tuzilgan litsenziya kelishuvlari soni esa 260 tadan oshgan.