Google Gemini bepul foydalanuvchilariga faqat Flash-Lite modelini qoldiradi

Kompaniyaning rasmiy maʼlumotlariga koʻra, xizmatning bepul versiyasidan ancha baquvvat Flash va Pro modellari olib tashlanadi. Flash toifasidan foydalanish imkoniyati Google AI Plus rejasi obunachilarida saqlanib qoladi, Pro modellari esa faqat AI Pro va AI Ultra darajalarida mavjud boʻladi. Shu bilan birga, yuqori obuna egalari barcha uchta toifadagi modellar bilan ishlash imkoniyatini saqlab qoladilar.

Bir vaqtning oʻzida Google AI Pro tarifi funksionalini kengaytirib, unga avval faqat AI Ultraʼda taklif qilingan ilgʻor Deep Think parallel fikrlash rejimini qoʻshadi. Bundan tashqari, oktabr oyida modellar uchun hisoblash yuklamasining uchta — past, oʻrta va yuqori darajasi joriy etiladi. Yuklamaning oshirilishi tizimga javob uchun koʻproq resurs ajratish imkonini beradi, biroq foydalanuvchi limitlarining sarflanishini tezlashtiradi.

Yangi qoidalar shaxsiy hisob yozuvlari uchun moʻljallangan Gemini isteʼmolchi ilovalariga daxldor boʻlib, Gemini API va AI Studio platformalariga avtomatik ravishda tatbiq etilmaydi. Bundan tashqari, kompaniya Antigravity dasturlash muhitida uchinchi tomon modellaridan foydalanishni ham moslashtiradi: Claude Sonnet 5.5 va Claude Opus 5.5 versiyalari faqat toʻliq toʻlovga ega AI Pro hamda AI Ultra tariflarida ochiladi, 2-noyabrdan esa Antigravityʼdan Claude Sonnet 4.6, Claude Opus 4.6 va GPT-OSS-120B modellari olib tashlanadi.