Oʻzbekiston 2026-yilgi Global innovatsion indeksda 77-oʻrinni egalladi

Innovatsion resurslar subindeksida mamlakat bir yil ichida koʻrsatkichini bir pogʻonaga yaxshilab, 68-oʻrinni egalladi. Innovatsion faoliyat natijalari subindeksida esa Oʻzbekiston 14 pogʻonaga koʻtarilib, 78-qatordan joy oldi.

Alohida indikatorlar boʻyicha respublika jahon yetakchilari qatoriga kirdi: fan va texnika (muhandislik) sohasidagi bitiruvchilar soni boʻyicha 2-oʻrin, tadbirkorlik siyosati va madaniyati boʻyicha 3-oʻrin, startaplar va kengayib boruvchi kompaniyalarni moliyalashtirish boʻyicha 4-oʻrin, shuningdek, mehnat unumdorligining oʻsishi boʻyicha 7-oʻrin. Mintaqaviy kesimda Oʻzbekiston Markaziy va Janubiy Osiyodagi 11 ta davlat orasida 4-boʻldi, daromad darajasi oʻrtachadan past boʻlgan mamlakatlar toifasida esa 36 tadan 8-oʻrinni egalladi.

Tadqiqot har yili Butunjahon intellektual mulk tashkiloti (WIPO) tomonidan Portulans instituti bilan hamkorlikda 80 ga yaqin koʻrsatkichni tahlil qilgan holda tuziladi. 2025-yilda Oʻzbekiston 139 ta davlat ichida 79-oʻrinni egallagan boʻlsa, 2015-yilda ushbu indeksga ilk bor kiritilganida 141 ta mamlakat orasida 122-pogʻonada boʻlgan.