Honor Magic 9 va Magic 9 Pro Max smartfonlarini taqdim etdi

Har ikkala qurilma ikkita 200 megapikselli sensor (asosiy va teleobyektiv), 50 MP li keng burchakli modul hamda korpusni burmasdan kadr yoʻnalishini oʻzgartirish imkonini beruvchi 1:1 formatidagi kvadrat sensorga ega 55 MP li frontal kamera bilan jihozlangan. Tasvirni qayta ishlash tizimi Germaniyaning kino uskunalari ishlab chiqaruvchisi ARRI mutaxassislari bilan birgalikda sozlangan boʻlib, ARRI Looks profillari, ARRI LogC3 formati qoʻllab-quvvatlovi va alohida 6 nanometrli H1 chipi joriy etilgan.

Magic 9 bazaviy versiyasi 120 Gts chastotali 6,37 dyuymli OLED-displey, Snapdragon 8 Elite Gen 5 chipi hamda 80 Vt simli va 50 Vt simsiz quvvatlanishga ega 8000 mA·soatlik batareyani oldi. Magic 9 Pro Max modeli 6,8 dyuym diagonalli LTPO OLED ekrani, Snapdragon 8 Elite Extreme Gen 6 protsessori va 100 Vt gacha simli hamda 80 Vt gacha simsiz quvvatlanishni qoʻllab-quvvatlaydigan 8800 mA·soat sigʻimli akkumulyator bilan jihozlangan. Qurilmalar uchun 200 va 500 mm li tashqi almashtiriladigan telekonverter-obyektivlar ham koʻzda tutilgan.

Smartfonlar MagicOS 11 xususiy qobigʻiga ega Android 17 asosida ishlaydi. Xitoy bozorida 12 GB tezkor va 256 GB oʻrnatilgan xotiraga ega konfiguratsiyalar uchun Magic 9 narxi 4999 yuandan, Magic 9 Pro Max narxi esa 6499 yuandan boshlanadi.