Fargʻonada agrodronlar ishlab chiqarish boʻyicha texnopark tashkil etish rejalashtirilmoqda

Fargʻona viloyati hokimligining tegishli qarori loyihasi normativ-huquqiy hujjatlar portalida jamoatchilik muhokamasiga qoʻyildi. OʻzA milliy axborot agentligi xabariga koʻra, texnoparkni Fargʻona davlat texnika universiteti qoshida «Ekoshahar» majmuasi sanoat zonasidagi 1 gektar maydonda joylashtirish koʻzda tutilgan.

Maydonni oliy taʼlim muassasasi tomonidan xitoylik investor bilan hamkorlikda taʼsis etilayotgan Hongsheng Texnologik Rivojlantirish kompaniyasi orqali boshqarish rejalashtirilgan. Texnopark doirasida agrodronlar va ularning ehtiyot qismlarini ishlab chiqarishni yoʻlga qoʻyish, shuningdek, ularni sinovdan oʻtkazish, sotish, saqlash, ularga servis xizmati koʻrsatish va taʼmirlash koʻzda tutilgan. Bundan tashqari, maydonda ilmiy-tadqiqot markazlari, sinov poligonlari, laboratoriyalar hamda operatorlarni oʻqitish va sertifikatlash uchun oʻquv majmualari tashkil etilishi nazarda tutilgan.

Loyiha orqali kompaniyaga yuridik shaxslarga agrotexnik xizmatlar koʻrsatishga, xususan, ekinlar monitoringini olib borish, mineral oʻgʻitlar va oʻsimliklarni himoya qilish vositalarini kiritishga ruxsat berish taklif etilmoqda. Bunda dronlarning maksimal parvoz balandligi 30 metrni tashkil etadi, ularni esa faqat sertifikatlangan mutaxassislar boshqara oladi. Hujjat loyihasi muhokamasi 9-oktabrgacha davom etadi.