Toshkentda davlat Xalqaro moda akademiyasi tashkil etiladi

Yangi oliy taʼlim muassasasi Yengil sanoatni rivojlantirish agentligi tuzilmasiga kiradi. OTM Toshkent toʻqimachilik va yengil sanoat instituti hamda Parij xalqaro moda akademiyasining qoʻshma taʼlim dasturi negizida tashkil etiladi. Qoʻshma dasturning barcha talabalari oʻqishni akademiyada davom ettiradilar va uning diplomlarini oladilar.

Darslar 2026/2027-oʻquv yilidan boshlanadi, abituriyentlarni qabul qilish esa qonunchilikda belgilangan umumiy tartibda amalga oshiriladi. OTM nafaqat qoʻshma kurslarni, balki bakalavriat va magistraturaning oʻz taʼlim dasturlarini ham amalga oshirishi mumkin boʻladi. Muassasa negizida milliy brendlarni yaratish hamda davlat buyurtmasi boʻyicha kiyimlar dizaynini ishlab chiqish rejalashtirilmoqda. 2027/2028-oʻquv yilidan boshlab sohaviy toʻqimachilik, tikuvchilik, trikotaj hamda charm-poyabzal ishlab chiqarish korxonalarining ehtiyojlariga moslashtirilgan dual taʼlim joriy etiladi.

Shu davrdan boshlab, oʻrtacha balli akademiya tomonidan belgilangandan kam boʻlmagan sohaviy texnikumlar bitiruvchilari toʻgʻridan-toʻgʻri toʻlov-kontrakt asosidagi bakalavriatning uchinchi kursiga qabul qilinishi mumkin boʻladi. Bundan tashqari, davlat-xususiy sheriklik mexanizmi asosida 2028-yil oxiriga qadar 400 oʻrinli yotoqxonani foydalanishga topshirish koʻzda tutilgan; ishlar yakunlanguniga qadar institutdan oʻtkazilgan talabalar institut yotoqxonasida yashashlari mumkin boʻladi.