Toshkentda 2027-yilga borib maktab va bogʻchalarda 14 mingdan ortiq oʻrin yaratish taklif qilindi

Loyihalarni Oʻzbekiston Respublikasining 2027-yilga moʻljallangan ijtimoiy va ishlab chiqarish infratuzilmasini rivojlantirish dasturiga kiritish rejalashtirilmoqda. Poytaxt maʼmuriyati maʼlumotlariga koʻra, takliflar shahar hokimi oʻrinbosari Durdona Rahimova rahbarligidagi ishchi guruh tomonidan tumanlardagi taʼlim muassasalarining qamrov darajasi tahlili natijalari asosida shakllantirilgan.

Maktab taʼlimi sohasida har biri 1 980 nafar oʻquvchiga moʻljallangan ikkita yangi maktab qurish taklif etilmoqda. Yana 8 430 ta oʻrin Mirzo Ulugʻbek, Yashnobod, Sergeli, Yunusobod, Shayxontohur, Uchtepa, Olmazor va Yangihayot tumanlaridagi mavjud toʻqqizta maktabni rekonstruksiya qilish va qoʻshimcha binolar barpo etish hisobiga olinishi rejalashtirilgan. Shuningdek, Chilonzor tumanidagi 178- va 90-sonli maktablar hamda Yakkasaroy tumanidagi 172-sonli maktabni mukammal taʼmirlash rejalashtirilgan.

Maktabgacha taʼlim sohasida Shayxontohur, Yashnobod va Olmazor tumanlaridagi toʻrtta muassasada 930 oʻrinli qoʻshimcha binolar qurish va rekonstruksiya qilish, shuningdek, Chilonzor va Mirzo Ulugʻbek tumanlaridagi toʻrtta bolalar bogʻchasini mukammal taʼmirlash koʻzda tutilgan.

Avvalroq poytaxt hokimi Shavkat Umurzoqov «Gazeta.uz» nashriga bergan intervyusida shahar har yili kamida 15 mingta oʻquvchi oʻrnini yaratib, yanada sigʻimli obyektlar qurish orqali tanqislikni bartaraf etish niyatida ekanini maʼlum qilgan edi. Uning soʻzlariga koʻra, 2026-yil boshida maktablar, bogʻchalar va sport muassasalarini rivojlantirish uchun 100 million dollarga yaqin mablagʻ zaxiraga ajratilgan.