Toshkentda talabalar TDTUning foydalanishga topshirilmagan yotoqxonasidan chiqarildi

Tegishli idora maʼlumotlariga koʻra, Talabalar shaharchasi hududidagi yotoqxona binosi hali kadastr hujjatlarini va foydalanish uchun rasmiy ruxsatnomalarni olmagan. Bundan tashqari, obyektda isitish va issiq suv taʼminoti tizimlari toʻliq hajmda ishga tushirilmagan, qurilish ishlari esa belgilangan muddatda yakunlanmagan.

Vazirlik maʼlum qilishicha, tadbirkor talabalarni tegishli yoʻllanmalarsiz va belgilangan tartibni buzgan holda joylashtirgan, bu haqda esa OTM va vazirlik oldindan ogohlantirilmagan. Yashaganlar orasida boshqa institutlar talabalari va chet ellik talabalar ham boʻlgan. Xavfsizlik maqsadida ular binodan chiqarildi: TDTU talabalari vaqtincha universitetning boshqa yotoqxonalaridagi boʻsh oʻrinlarga joylashtirildi, boshqa muassasalar talabalari esa oʻz tashkilotlari vakillariga topshirildi. Idora maʼlumotlariga koʻra, tadbirkor yashash uchun toʻlangan toʻlovni toʻliq qaytargan.

Kun.uz nashriga murojaat qilgan talabalar maʼlum qilishicha, xonalarni boʻshatish zarurligi haqida ularga 5-oktabr kuni eʼlon qilingan, 6-oktabr oqshomida esa binoni 300 ga yaqin kishi tark etgan. Ularning bir qismi hostellarga yoki tanishlarinikiga ketishga majbur boʻlgan. Vazirlikda taʼkidlanishicha, kadastrni rasmiylashtirish va ruxsatnomalarni olish jarayoni davom etmoqda, shundan soʻng obyektni rasman foydalanishga topshirish rejalashtirilmoqda.