Oʻzbekiston OTMlarida 2027-yildan biznes buyurtmasi boʻyicha dual taʼlim yoʻlga qoʻyiladi

Kadrlar tayyorlash «korxona — OTM — maqsadli mutaxassis» tizimi boʻyicha amalga oshiriladi. Bakalavriat yoʻnalishlari va qabul kvotalarini OTMlar har yili 1-sentabrgacha Oliy taʼlim, fan va innovatsiyalar vazirligi bilan kelishgan holda belgilaydi, korxonalarning buyurtmalari boʻyicha toʻlov-kontrakt asosida talabalarni qabul qilish esa 1-oktabrgacha davom etadi.

Taʼlim uch tomonlama shartnoma asosida tashkil etiladi: ish beruvchi talabaga kamida 1 MHTEKM miqdorida ish haqi toʻlash majburiyatini oladi, bitiruvchi esa tashkilotda kamida ikki yil ishlab berishi shart boʻladi. Oʻqish davri umumiy mehnat stajiga qoʻshiladi. Ustuvor sohalardagi (muhandislik, ishlab chiqarish va qayta ishlash, arxitektura va qurilish, qishloq xoʻjaligi) talabalar uchun yuqori oʻzlashtirish koʻrsatkichlariga ega boʻlgan taqdirda ikkinchi kursdan grantga oʻtish koʻzda tutilgan. Ijtimoiy reyestrdagi oilalardan boʻlgan talabalar budjet asosida tahsil oladi va ijtimoiy stipendiya olishlari mumkin boʻladi.

2027-yil 1-yanvardan davlat ustuvor sohalarda bunday talabalarning ish haqi xarajatlarining 50 foizini kompaniyalarga qoplab berishni boshlaydi. Bundan tashqari, ishtirok etuvchi korxonalarga «Barqarorlik reytingi»da ballar beriladi, uskunalarni uch yillik tezlashtirilgan amortizatsiya qilish huquqi taqdim etiladi hamda 2030-yil 1-yanvargacha oʻquv bazalari uchun texnika olib kirishda 1 foizli bojxona boji belgilanadi.