Oʻzbekistonda shaxmatchilarning jahon turnirlari medallari uchun mukofot puli oshirildi

Hujjatga muvofiq, kattalar oʻrtasidagi Butunjahon shaxmat olimpiadasi va paralimpiadasidagi oltin medal uchun sportchilar 200 ming dollar, murabbiylar esa 50 ming dollar oladi. Kumush medal uchun toʻlov tegishlicha 100 ming va 25 ming dollarni, bronza medal uchun esa 50 ming va 12,5 ming dollarni tashkil etadi. Ilgari bu summalar bazaviy hisoblash miqdorlarida hisoblangan: sportchiga birinchi oʻrin uchun BHMning 2000 baravari, ikkinchi oʻrin uchun 1000 baravari, uchinchi oʻrin uchun esa 500 baravari berilar edi.

Ilk bor yoshlar oʻrtasidagi Butunjahon shaxmat olimpiadasi va paralimpiadasi uchun alohida mukofotlar joriy etildi: oltin uchun 20 ming dollar, kumush uchun 10 ming va bronza uchun 5 ming dollar (murabbiylarga tegishlicha 5 ming, 2,5 ming va 1,25 ming dollar).

FIDE tasnifidagi jahon miqyosidagi musobaqalarda gʻoliblarga 15 ming dollar, kumush medal egalariga 7,5 ming, bronza medal sohiblariga 3,75 ming dollar belgilandi (murabbiylarga — 7 ming, 3,5 ming va 1,75 ming). FIDEning Osiyo miqyosidagi turnirlarida shaxmatchilar oltin uchun 10 ming, kumush uchun 5 ming va bronza uchun 2,5 ming dollar oladi (murabbiylar — 5 ming, 2,5 ming va 1,25 ming). Shaxmatchilarga xalqaro grossmeyster sport unvoni berilganligi uchun avvalgi 100 BHM oʻrniga 5 ming dollar miqdorida bir martalik toʻlov tayinlandi.

Murabbiylarga mukofotlar sportchini oxirgi bir yil davomida tayyorlagan mutaxassislarga beriladi. Bir nechta murabbiy ishtirok etgan taqdirda, summa murabbiylar kengashining qaroriga asosan taqsimlanadi.