Toshkentda 174 mln yevrolik bolalar onkologik yordami loyihasi maʼqullandi

Asosiy tadbirlar Bolalar onkologiyasi, gematologiyasi va immunologiyasi respublika ixtisoslashtirilgan ilmiy-amaliy tibbiyot markazi negizida rejalashtirilgan. Yangi davolash-diagnostika korpusini qurish va jihozlash, shuningdek, mavjud korpuslarni rekonstruksiya qilish uchun 139 million yevro ajratish koʻzda tutilgan. Yana 35 million yevro bolalar saratoni boʻyicha Xalqaro akademik markazni rivojlantirish, jumladan, ilmiy tadqiqotlar va shifokorlarni tayyorlashga yoʻnaltiriladi.

Yangi korpusda nur terapiyasi va yadroviy tibbiyotni rivojlantirish rejalashtirilgan: dastlabki jihozlash rejasi toʻrtta chiziqli tezlatgich, ikkita MRT apparati, PET/KT majmuasi va radiofarmatsevtika vositalarini tayyorlash uchun siklotronni oʻz ichiga oladi. Amaldagi majmuada poliklinika, qabulxona, jarrohlik va statsionar boʻlimlarni yangilash, shuningdek, kimyoterapiya uchun 56 oʻrinli kunduzgi statsionarni tashkil etish moʻljallanmoqda.

Dasturni amalga oshirish 2027–2030-yillarga moʻljallangan. Xarajatlarni qoplash uchun xalqaro moliya institutining uzoq muddatli qarzini jalb etish rejalashtirilgan, biroq aniq kreditor va moliyalashtirish shartlari hozircha belgilanmagan.