STADA 2026 soʻrovi: Oʻzbekiston aholisining 82 foizi sogʻliqni saqlash tizimidan mamnun

Tizimdan qoniqish koʻrsatkichi bir yil ichida 13 foiz bandga oʻsdi. Tadqiqot qamrab olgan 20 ta davlat boʻyicha oʻrtacha koʻrsatkich 56 foizni tashkil etdi, Oʻzbekiston esa ushbu ulush boʻyicha faqat Belgiyadan (86%) ortda qoldi. Tizim ishidan toʻliq mamnun boʻlganlar soʻralganlarning 22 foizini tashkil etdi (2025-yildagi 7 foizga nisbatan), yana 60 foizi esa uni ijobiy baholadi. Shu bilan birga, oʻzbekistonliklarning 52 foizi milliy sogʻliqni saqlash tizimi raqamli vositalar va xizmatlar bilan yaxshi taʼminlangan deb hisoblaydi, holbuki tadqiqot boʻyicha oʻrtacha koʻrsatkich 28 foizni tashkil qiladi.

Salomatlik bilan bogʻliq mavzularda sunʼiy intellektdan Oʻzbekiston aholisining 55 foizi, 35 yoshgacha boʻlgan yoshlar orasida esa 69 foizi foydalanadi. Biroq fuqarolar shifokor oʻrnini texnologiyalar bilan toʻliq almashtirishga tayyor emas: respondentlarning 47 foizi SI qoʻygan tashxislarga mutaxassislar bilan teng darajada ishonmaydi. Koʻpincha algoritmlar yordamchi vosita boʻlib xizmat qiladi: ishtirokchilarning 21 foizi shifokor qabulidan soʻng ikkinchi fikrni olish uchun, 15 foizi esa tashxisni yaxshiroq tushunish uchun SIga murojaat qiladi. Salomatlik masalalarida 55% uchun shifokorlar, 53% uchun turmush oʻrtoqlari yoki juftlari, 49% uchun esa oila aʼzolari shaxsiy yoʻnaltiruvchi boʻlib qolmoqda.

Shu bilan birga, hisobot profilaktika bilan shugʻullanishning pasayganini qayd etdi: mamlakat aholisining 48 foizi rejali profilaktik koʻriklardan oʻtmasligini maʼlum qildi (2025-yildagi 39 foiz, 2023-yildagi 25 foiz va 20 ta mamlakat boʻyicha oʻrtacha 33 foizga nisbatan). Moliyalashtirish ustuvorliklarini tanlash imkoniyati boʻlgan taqdirda, soʻrov ishtirokchilarining 59 foizi resurslarni qishloq joylarda va xizmatlardan foydalanish imkoniyati cheklangan hududlarda tibbiyotni rivojlantirishga, 36 foizi birlamchi yordamni kengaytirishga, 35 foizi esa navbatlarni qisqartirish va tibbiyot xodimlari shtatini kengaytirishga yoʻnaltirgan boʻlardi.