Toshkent dorixonalarida dori narxlari olti baravargacha oshirilgani aniqlandi

Narxlarni asossiz oshirish holatlari qoʻmita mutaxassislari tomonidan «sirli xaridor» usulidagi nazorat tadbirlari davomida qayd etildi. Xususan, «SHUNQORLAR» MCHJ dorixonasida «Konvuleks» tomchilari belgilangan me’yor 66 481 soʻm boʻlgani holda 395 000 soʻmga (deyarli 6 baravar qimmat), «Polimik» preparati esa 12 837,18 soʻm oʻrniga 70 000 soʻmga sotilgan. «MUNO FARM» MCHJ dorixonasida «Stimuloton» tabletkalari belgilangan 50 666,17 soʻm oʻrniga 295 000 soʻm turgan.

«Baktamed» preparati narxining oshirilishi «CITY FARM» MCHJda qayd etilgan boʻlib, u yerda dori 18 849,43 soʻm oʻrniga 63 000 soʻmdan, shuningdek «AMIR FARM TRADE» MCHJda 20% oʻrniga 100 foizlik ustama qoʻllangan holda 32 000 soʻmdan sotilgan. «HOSIL FARM» MCHJ dorixonasida «Lantus SOLOSTAR» preparati uchun ruxsat etilgan 115 173,3 soʻm oʻrniga 190 000 soʻm talab qilingan, «Slideron» tabletkalari esa 115 677,1 soʻm me’yorida boʻlgani holda 349 000 soʻmdan taklif qilingan. «No-shpa» preparatiga cheklangan narxlarning oshirilishi «CITY FARM», «LEADER PHARMGROUP» XF, «PHARM S GOLDEN» MCHJ va «RUSLAN BUYUK FARM» MCHJ dorixonalarida aniqlangan.

Aniqlangan qoidabuzarliklar boʻyicha antimonopoliya qoʻmitasi majburiy koʻrsatmalar berdi. Subyektlar tomonidan litsenziya talablariga rioya etilishi masalasini koʻrib chiqish uchun materiallar va soʻrovlar litsenziyalovchi organlarga yuborildi.