Oʻzbekistonda ichimliklarni shakar miqdori boʻyicha markirovkalash taklif qilindi

Muhokama uchun eʼlon qilingan hujjatga koʻra, talablar mamlakat ichida ishlab chiqariladigan hamda import qilinadigan alkogolsiz mahsulotlarga taalluqli boʻladi. Belgini qadoqning old tomoniga tushirish rejalashtirilmoqda, bunda yozuv uning umumiy maydonining kamida 15 foizini egallashi lozim. Idishda qoʻshimcha ravishda tarkibi, kaloriyasi va sutkalik meʼyori haqidagi maʼlumotlarni oʻz ichiga olgan QR-kod ham koʻzda tutilgan.

Loyiha ichimlikning 100 ml hajmiga nisbatan yozuvlarning uchta darajasini nazarda tutadi. Shakar miqdori 5 dan 8 grammgacha boʻlganda «Oʻrtacha shakar miqdori», 8 dan 11 grammgacha boʻlganda — «Yuqori shakar miqdori» degan ogohlantirish tushiriladi. Koʻrsatkich 11 gramm va undan yuqori boʻlgan taqdirda, qadoqqa qizil fonda oq matn bilan: «Juda yuqori shakar miqdori — tez-tez isteʼmol qilish salomatlik uchun zararli» deb yozish majburiy etiladi.

2027-yil 1-martgacha laboratoriya tahlilining yagona metodikasini tasdiqlash, 1-sentabrgacha esa akkreditatsiyadan oʻtgan laboratoriyalarda tekshiruvlarni tashkil etish rejalashtirilmoqda. Sogʻliqni saqlash vazirligi, shuningdek, loyihada belgilangan koʻrsatkichlardan oshib ketgan ichimliklar reyestrini har chorakda eʼlon qilib borishni taklif qilmoqda. 2027-yil 1-dekabrgacha monitoring raqamli platformasini yaratish, 2028-yil 1-yanvargacha esa talablarga javob bermaydigan mahsulotlarni olib kirishni taqiqlagan holda import uchun shakar miqdorini elektron deklaratsiyalashni joriy etish koʻzda tutilgan.