Shavkat Mirziyoyev Marko Rubio va Serjio Gorni Oʻzbekiston ordenlari bilan taqdirladi

AQSh Davlat kotibi Marko Rubio «Buyuk xizmatlari uchun» ordeni bilan taqdirlandi. Prezident uning strategik sheriklikni rivojlantirish, ikki mamlakat oʻrtasidagi siyosiy, savdo-iqtisodiy va madaniy-gumanitar aloqalarni kengaytirish, shuningdek, Oʻzbekistonning xalqaro tashabbuslarini ilgari surish hamda Markaziy Osiyoda barqarorlikni mustahkamlashga qoʻshgan shaxsiy hissasini qayd etdi.

AQSh Prezidentining Janubiy va Markaziy Osiyo boʻyicha maxsus vakili Serjio Gor «Doʻstlik» ordeni bilan taqdirlandi. Xabarga koʻra, mukofot ikki tomonlama muloqotni rivojlantirishga koʻmaklashish, erishilgan kelishuvlarni amaliy roʻyobga chiqarish, loyihalarga AQSh investitsiyalarini jalb etish hamda Amerika-Oʻzbekiston ishbilarmonlik va investitsiya kengashi doirasidagi faoliyat uchun berilgan.

Avvalroq davlat rahbari Marko Rubio bilan uchrashuv oʻtkazgan edi. Davlat kotibi Oʻzbekistonga «C5+1» formatidagi vazirlar uchrashuvi hamda qoʻshma ishbilarmonlik va investitsiya kengashining ikkinchi yigʻilishida ishtirok etish uchun kelgan.