Mirziyoyev oziq-ovqat sohasida hamkorlik dasturini taklif qildi

Davlat rahbari tashabbusni ishlab chiqishni Markaziy Osiyo mamlakatlaridan boshlashga chaqirdi. Uning soʻzlariga koʻra, dengizga chiqish imkoniyati boʻlmagan davlatlarning oziq-ovqat xavfsizligiga yuqori transport xarajatlari va tranzit mamlakatlardagi qiyinchiliklar salbiy taʼsir koʻrsatmoqda. Shu munosabat bilan Oʻzbekiston savdo va logistika zanjirlari erkinligi, shuningdek, oziq-ovqat mahsulotlarini tashish qoidalarini soddalashtirish tarafdori hisoblanadi.

Prezident, shuningdek, xalqaro moliya institutlari va investorlarga oziq-ovqat mahsulotlarini muzlatkichlarda saqlash, qayta ishlash va tashish boʻyicha qoʻshma loyihalarni amalga oshirishni taklif qildi. U Oʻzbekiston 2030-yilga kelib oziq-ovqat mahsulotlari ishlab chiqarishni ikki barobarga, uning eksport hajmi va qoʻshilgan qiymatini esa uch barobarga oshirish niyatida ekanini qoʻshimcha qildi.

Murojaatda keltirilgan FAO maʼlumotlariga koʻra, dunyoda 645 milliondan ortiq inson ochlikdan aziyat chekmoqda, agar choralar koʻrilmasa, 2028-yilga borib bu koʻrsatkich 1 milliard kishiga yetishi mumkin. Toshkentda 7–8-oktyabr kunlari Butunjahon paxta kuni va oziq-ovqat xavfsizligi masalalariga bagʻishlab oʻtkazilayotgan tadbirlarda 30 dan ortiq davlat vakillari ishtirok etmoqda.