Rossiya Oʻzbekistonga naqd rubl olib chiqishni 1 mln rubl miqdorida chekladi

Cheklov Yevroosiyo iqtisodiy ittifoqi mamlakatlariga (Armaniston, Belarus, Qozogʻiston, Qirgʻiziston), shuningdek, Ozarbayjon, Tojikiston va Oʻzbekistonga safarlarga nisbatan amal qiladi. Yuridik shaxslar va yakka tartibdagi tadbirkorlarga ushbu davlatlarga naqd rubl olib chiqish summasidan qatʼi nazar butunlay taqiqlandi.

Jismoniy shaxslar mablagʻlar hisobvaraqdan yechib olingani toʻgʻrisida bankdan koʻchirma taqdim etgan taqdirda, hukumat tomonidan tasdiqlangan xalqaro aeroportlar orqali 1 mln rubldan ortiq mablagʻni olib chiqish huquqiga ega. Shuningdek, xalqaro tashuvlar hamda diplomatik va konsullik vakolatxonalari faoliyatini taʼminlash uchun istisnolar amal qiladi.

Qoidabuzarlik holatlarida jismoniy shaxslardan belgilangan 1 mln rubl limitidan oshib ketgan summa olib qoʻyiladi. Yuridik shaxslar va yakka tartibdagi tadbirkorlardan esa olib oʻtilayotgan barcha naqd pul musodara qilinadi. RF hukumati va Rossiya Bankiga uch oy muddatda olib oʻtilayotgan valyutani hisobga olish tartibini ishlab chiqish topshirildi.