Oʻzbekiston IIV oktabr oyida 9139 ta gaz baloni va 333 tonna koʻmirni musodara qildi

Vazirlik maʼlumotlariga koʻra, koʻmir bilan bogʻliq 16 ta qoidabuzarlik qayd etilgan. Noqonuniy muomaladan 333,54 tonna yoqilgʻi olib qoʻyilib, aholiga topshirildi. Suyultirilgan gaz boʻyicha 374 ta holat aniqlanib, 9139 ta balon va 92,9 tonna gaz olib qoʻyildi, ularni isteʼmolchilarga qaytarish choralari koʻrildi. IIVda taʼkidlanishicha, talon-torojliklarga koʻpincha gaz taʼminoti korxonalari xodimlari aloqador boʻlgan.

Holatlardan biri Samarqand viloyati bilan bogʻliq. Tergov taxminiga koʻra, oktabr oyida «Pastdargʻomtumangaz» korxonasi xodimlari oʻzaro til biriktirib, aholiga moʻljallangan maishiy balonlarni maxsus transportda olib chiqib ketgan. Ulardan qiymati 32 mln soʻmlik 3,1 tonna gaz olib qoʻyildi, oʻzlashtirish yoki rastrata yoʻli bilan talon-toroj qilish toʻgʻrisidagi 167-moddaning ikkinchi qismi «v» bandi bilan jinoyat ishi qoʻzgʻatildi.

Yigʻilishda balonlarni grafik boʻyicha yetkazib berish, hisobini yuritish hamda tashish va taqsimlashning shaffofligini taʼminlash, asossiz toʻlovlarga va yoqilgʻini meʼyoridan kam berishga yoʻl qoʻymaslik topshirildi. Hisobotlarning amaldagi hajmlar bilan nomuvofiqligini, toʻliq yetkazib bermaslik va suiisteʼmolchiliklarni aniqlash maqsadida tezkor-profilaktik tadbirlarni kuchaytirish belgilandi. IIV «Hududgaztaʼminot» AJ va Transport vazirligi bilan birgalikda tashish yoʻnalishlarini nazorat qiladi hamda gaz toʻldirish shoxobchalari, omborlar va taqsimlash bazalari qoʻriqlanishini kuchaytiradi.

15-noyabrdan boshlab aholi uchun suyultirilgan gaz narxi bir kilogramm uchun 2000 soʻmdan 5000 soʻmga oshadi, ijtimoiy himoyaga muhtoj oilalarga oyiga 60 ming soʻmgacha kompensatsiya koʻzda tutilgan. 2027-yilning fevral oyidan boshlab maishiy balonlarni AGQSHlarda toʻldirganlik uchun jarima solish boshlanadi.