2026-yilning toʻqqiz oyida oʻzbekistonlik migrantlar foydasiga 850 ming dollar undirildi

Mablagʻlar xorijda ishlagan oʻzbekistonliklarning 817 ta murojaati asosida qaytarildi. Bunday holatlarning aksariyati Rossiya bilan bogʻliq — 533 ta. Yana 155 ta murojaat Turkiya, 92 tasi Janubiy Koreya, 37 tasi boshqa davlatlar hissasiga toʻgʻri keladi.

Bundan tashqari, agentlik vositachilar va xorijiy ish beruvchilarda qolib ketgan shaxsni tasdiqlovchi hujjatlarni qaytarishga ham yordam berdi. Shu davr ichida 532 nafar fuqaro oʻz hujjatlarini qaytarib oldi. Davlatlar kesimida bu koʻrsatkich Rossiyada 331 ta, Turkiyada 185 ta, Qozogʻistonda 11 ta va Janubiy Koreyada 5 tani tashkil etdi.

Idorada chet elda mehnat faoliyati davomida ish haqi, hujjatlar yoki ishga joylashish bilan bogʻliq qiyinchiliklarga duch kelganlar qayerga murojaat qilishlari mumkinligini ham eslatib oʻtishdi. Buning uchun 1282 qisqa raqami va @huquqiy_yordam_uzbot Telegram boti ishlab turibdi, bot orqali arizalar tunu kun qabul qilinadi.