Qurilish va UJX vazirligi markaziy isitishdan uzilish taqiqlanganini eslatdi

Muxtor isitish tizimiga oʻtish masalasi Qurilish va UJX vazirligining 2026-yil 1-noyabrdan boshlab aholi uchun issiqlik taʼminoti va issiq suv tariflarini oʻrtacha 30 foizga oshirish tashabbusi fonida koʻtarildi. Toshkentda Veolia Energy Tashkent abonentlari uchun isitiladigan maydonning har bir kvadrat metri uchun kunlik tarifni QQS bilan 241,44 soʻmdan 314 soʻmgacha koʻtarish taklif etilmoqda. Jurnalistlar 60 kv. m isitiladigan maydonga ega kvartira uchun xarajatlar oyiga qariyb 565 ming soʻmni tashkil etishi mumkinligini taʼkidladilar, bu esa individual qozon egalarining xarajatlaridan yuqoridir.

Vazir oʻrinbosari Vazirlar Mahkamasining 2014-yil 5-iyuldagi 194-sonli qarorining 88-bandiga havola qildi. Hujjat isteʼmolchilarga isitish asboblarini oʻzboshimchalik bilan demontaj qilishni, uy ichidagi tarmoqlarni oʻzgartirishni va talablarni buzgan holda qoʻshimcha uskunalar oʻrnatishni toʻgʻridan-toʻgʻri taqiqlaydi.

Joʻrayevaning soʻzlariga koʻra, tizimga aralashuv qoʻshnilarning issiqlik taʼminotini buzadi. Tekshiruvlar shuni koʻrsatmoqdaki, aholi koʻpincha umumiy quvurlarga issiq pollarni noqonuniy ulab oladi yoki batareyalarni balkonga chiqaradi. U, shuningdek, mamlakatda yangi qurilgan uylarda individual qozonlardan bosqichma-bosqich voz kechilayotganini eslatib oʻtdi: 2025-yil oktabr oyidayoq yangi uylarni isitish uchun gazga texnik shartlar berish toʻxtatilgani haqida xabar berilgan edi.