Prezidentga qutqaruvchilar yetib kelish vaqtini 5–7 daqiqagacha qisqartirish taklif qilindi

Prezident «oltin daqiqa» tamoyilini joriy etishni topshirdi. Buning uchun aholisi 250 ming kishidan oshadigan shahar va tumanlarda 25 ta yongʻin-qutqaruv qismini qayta tashkil etish va ularni yangi texnika bilan jihozlash rejalashtirilmoqda. Shuningdek, murakkab sharoitlarda ishlash uchun «Madad» milliy qutqaruv markazi, havo transportidagi qutqaruvchilar boʻlinmasi hamda favqulodda vaziyatlarni boshqarish sohasida ilmiy markaz tashkil etish taklif qilindi.

«112» xizmatida murojaatlarni nazorat qilish barcha bosqichlarda — kelib tushishidan to ijrogacha kuchaytiriladi, tezkor xizmatlar oʻrtasida maʼlumot almashinuvi esa raqamli texnologiyalar va sunʼiy intellekt asosida yaxshilanishi rejalashtirilmoqda. Qutqaruvchilar texnikumida gʻavvoslarni dual taʼlim tizimi boʻyicha tayyorlash niyat qilingan, sayyohlik obyektlari xodimlariga esa birinchi yordam koʻrsatish va favqulodda vaziyatlardagi harakatlar oʻrgatiladi.

Taqdimotda keltirilgan maʼlumotlarga koʻra, mamlakatdagi 56 ta suv omboridan faqat toʻrttasida professional qutqaruv xizmatlari mavjud. Boʻlinmalarni «Karkidon» suv ombori misolida tashkil etish taklif qilindi. Suv havzalari yaqinidagi sayyohlik xizmatlari uchun majburiy sertifikatlashtirish va qutqaruv xizmatlari bilan shartnomalar tuzish, tadbirkorlar uchun esa 2029-yil 1-oktabrgacha yer va mol-mulk soliqlarini ikki baravar kamaytirish hamda olib kiriladigan GPS uskunalari, qutqaruv va himoya vositalari boʻyicha bojxona toʻlovlarini 120 kunga kechiktirish yoki boʻlib-boʻlib toʻlash taklif etildi.

Taqdimot yakunlari boʻyicha idoralarga qutqaruv xizmatlari ishini jadallashtirish va sayyohlik obyektlari uchun xavfsizlik talablarini belgilash topshirildi.