Energetika vazirligi: qishda rejaviy taʼmirlashlardan tashqari elektr taʼminotida uzilishlar kutilmayapti

Idorada tushuntirilishicha, eskirgan tarmoqlar va tizimlarni yangilash uchun rejaviy taʼmirlashlar zarur. Xavfsizlik maqsadida bunday ishlar davomida yuqori kuchlanishli liniyalar vaqtincha elektrdan uziladi, shu sababli isteʼmolchilarga elektr energiyasini yetkazib berish toʻxtatib turiladi. Bunday uzilishlar haqida aholi oldindan ogohlantiriladi.

Vazirlik maʼlumotlariga koʻra, 2025-yilda kelib tushgan shikoyat va murojaatlar soni uchdan bir qismga kamayib, 108,3 mingtani tashkil etgan. Shu bilan birga, ilk bor gaz taʼminoti boʻyicha murojaatlar ulushi elektr energiyasi muammolari boʻyicha shikoyatlar ulushidan oshib ketgan (41% ga nisbatan 45%). Elektr energiyasi masalalari boʻyicha murojaatlar soni 40% ga qisqarib, 44 mingtani tashkil qilgan.

Fuqarolar eng koʻp transformatorlarni, shuningdek elektr uzatish liniyalari tayanchlarini oʻrnatish va taʼmirlash masalalarida murojaat qilgan — 17,4 mingta murojaat (35,8% ga kamayish). Bevosita elektr taʼminotidagi uzilishlar boʻyicha shikoyatlar soni 49,7% ga qisqarib, 14 mingta holatni tashkil etgan.