Yangi Toshkentda 2026-yil oxirigacha 20 mingta xonadonni foydalanishga topshirish rejalashtirilmoqda

Davlat rahbari bir vaqtning oʻzida infratuzilma: maktablar, tibbiyot muassasalari, dam olish, savdo va sport obyektlarini yaratish zarurligini taʼkidladi. Shuningdek, ushbu maʼlumotlarni biznesga taqdim etish uchun yangi shaharning mehmonxonalar, umumiy ovqatlanish va hordiq chiqarish maskanlariga boʻlgan ehtiyojini hisoblab chiqish vazifasi qoʻyildi.

Qurilayotgan shaharda FIFA standartlari boʻyicha 55 ming oʻrinli stadion qad rostlamoqda, u kelgusi yili U-20 futbol boʻyicha jahon chempionati oʻyinlarini qabul qiladi. Bir vaqtning oʻzida maʼmuriy tuzilmalarni koʻchirish davom etmoqda: Qurilish, Transport hamda Energetika vazirliklari yengil konstruksiyali binolarga joylashtirildi, vazirlik va idoralarning 2,6 ming nafar xodimi uchun yana toʻqqizta korpus qurilmoqda.

Bosh vazirga qolgan vazirliklar va davlat organlarini Yangi Toshkentga koʻchirishni boshlash topshirildi. Toshkentda boʻshaydigan davlat binolarini zarurat tugʻilganda joriy taʼmirlash sharti bilan hamda buzish yoki qayta qurish taqiqlangan holda sotish rejalashtirilmoqda.