Oʻzbekistonda odam savdosi qurbonlariga ijtimoiy xizmatlar koʻrsatish tartibi tasdiqlandi

Jabrlanganlarga shoshilinch tibbiy, psixologik va yuridik yordam koʻrsatiladi, hujjatlarni tiklash, yashash guvohnomasini rasmiylashtirish yoki fuqarolik tartib-taomillaridan oʻtishda, shuningdek, kasbga oʻqitish va ishga joylashishda koʻmaklashiladi. Ixtisoslashtirilgan muassasalarda olti oygacha boʻlgan muddatga bepul xavfsiz boshpana, oziq-ovqat va gigiyena vositalari koʻzda tutilgan. Ular bilan birga voyaga yetmagan farzandlari, voyaga yetmagan shaxsning bitta qonuniy vakili yoxud I guruh nogironligi boʻlgan shaxsga hamrohlik qiluvchi shaxs boʻlishi mumkin. Fuqarolarni muassasalarga yetkazishni IIV kuzatib boradi, yoʻl xarajatlarini esa «Saxovat va koʻmak» jamgʻarmasi bazaviy hisoblash miqdorining yarmi baravaridan bir baravarigacha miqdorda qoplab beradi.

Ayollar va ularning bolalari yashash joyiga yaqin boʻlgan muassasalarga yuboriladi, erkaklar, chet elliklar va repatriantlarni esa Ijtimoiy himoya milliy agentligi huzuridagi Odam savdosi jabrdiydalariga yordam koʻrsatish boʻyicha respublika reabilitatsiya markazi qabul qiladi. Ushbu markaz shtati 11 nafar xodim bilan cheklangan boʻlib, bitta xizmat avtomobili limiti belgilangan.

Yordam soʻrab «Inson» ijtimoiy xizmatlar markazlariga, ixtisoslashtirilgan muassasalarga, mahalladagi ijtimoiy xodimga yoki 1146 raqamiga taxminiy jabrlanuvchi deb eʼtirof etilganidan keyin bir oy ichida yoxud maqom rasman tasdiqlanganidan soʻng bir yil davomida murojaat qilish mumkin. Xizmatlardan, jumladan, hujjati yoʻq shaxslar ham foydalanishi mumkin. Yakka tartibdagi reabilitatsiya dasturi yakunlangach, «Inson» markazlari «Yagona milliy ijtimoiy himoya» tizimi orqali shaxsning holatini yashash joyi boʻyicha olti oylik monitoringdan oʻtkazadi, ushbu tizim integratsiyasini Ijtimoiy himoya milliy agentligi, Raqamli texnologiyalar vazirligi va IIV 1-noyabrgacha yakunlashi lozim.