Misr 1-noyabrdan Oʻzbekiston fuqarolari uchun kirishning yangi talablarini joriy etmoqda

Diplomatik missiya maʼlumotlariga koʻra, kirish vizasini oldindan Misrning diplomatik vakolatxonalari orqali rasmiylashtirish talab etiladi, sayyohlik safarlari esa vakolatli turoperatorlar orqali tashkil etilishi lozim.

40 yoshdan kichik boʻlgan sayyohlar mamlakatga faqat yaqin qarindoshlari — ota-onasi, turmush oʻrtogʻi yoki farzandlari bilan birga kirishlari mumkin boʻladi. Bunday oila uchun naqd koʻrinishda kamida 5000 dollar boʻlishi talab etiladi. Mustaqil ravishda sayohat qilayotgan 40 yoshdan oshgan sayohatchilar kamida 3000 dollar miqdoridagi naqd pul mablagʻiga ega boʻlishlari zarur.

Chegarada, shuningdek, mehmonxona band qilinganligi toʻgʻrisidagi hujjatni, mobil aloqa haqidagi maʼlumotlarni va moliyaviy mablagʻlar mavjudligini tasdiqlovchi hujjatni taqdim etish lozim boʻladi. Misrda boʻlish davrida sayyohlik vizasi toifasini oʻzgartirishning imkoni boʻlmaydi. Talab qilinadigan toʻliq hujjatlar toʻplamiga ega boʻlmagan yoʻlovchilarga mamlakatga kirish rad etilishi va ular olib kelgan aviakompaniya reysi bilan ortga qaytarilishi mumkin.