Anatoliy Kashpirovskiy vafot etdi

Sergey Rudixning soʻzlariga koʻra, oʻlim 3-oktyabr kuni ertalab yuz bergan. Direktor TASS agentligiga maʼlum qilganidek, Kashpirovskiyning qon bosimi keskin tushib ketgan, u tez yordam mashinasida shifoxonaga yetkazilgan va u yerda yuragi toʻxtab qolgan (SHOT telegram-kanalining maʼlumotiga koʻra, dastlabki sabab taxminan 06:40 da uyda yuz bergan oʻtkir yurak yetishmovchiligi boʻlgan). Yaqinlari uning vafotini keksayish bilan bogʻliq tabiiy sabablar bilan izohladi.

Kashpirovskiy 1939-yil 11-avgustda Ukrainada tugʻilgan. U Vinnitsa tibbiyot institutini tamomlagan, 20 yildan ortiq Vinnitsadagi psixiatriya shifoxonasida shifokor boʻlib ishlagan, shuningdek, ogʻir atletika boʻyicha SSSR terma jamoasi shifokor-psixoterapevti boʻlgan. 1993-yilda u birinchi chaqiriq Davlat dumasi deputatligiga saylangan.

Psixoterapevt 1980-yillarning oxirida Markaziy televideniyedagi teleseanslari orqali keng shuhrat qozongan, ularning davomida tomoshabinlar sogʻligʻiga masofadan taʼsir koʻrsatishini daʼvo qilgan. 1989-yilning kuzida u Toshkentdagi «Yubileyniy» sport saroyida ham seanslar oʻtkazgan. Kashpirovskiyning usullari tibbiyot mutaxassislari va olimlar tomonidan bir necha bor tanqid qilingan, 2024-yilda esa Rossiya Fanlar akademiyasi vakillari ularni soxta fan deb baholagan.