Energetika vazirligi: xususiy firmalar gazni uzish bilan tahdid qilishga haqli emas

Energetika vazirligi maʼlumotlariga koʻra, ayrim hududlardan xususiy kompaniyalar vakillarining tashriflari haqida xabarlar kela boshlagan. Ular gaz qozonlari va plitalariga texnik xizmat koʻrsatishni taklif qilib, buni majburiy ekanini taʼkidlamoqda va rad etilgan taqdirda gazni uzib qoʻyish bilan tahdid qilmoqda.

Idorada tegishli ruxsatnomalarga ega xususiy tuzilmalar uskunalarga xizmat koʻrsatish huquqiga ega ekanligi, biroq ishlar faqat isteʼmolchining oʻzining ogʻzaki, yozma yoki elektron buyurtmasiga koʻra, belgilangan tariflar va shartlar asosida amalga oshirilishi aniqlashtirildi. Vazirlar Mahkamasining 319-sonli qarorining 12-bandiga muvofiq, xususiy tashkilotlar isteʼmolchilarni tarmoqdan uzish vakolatiga ega emas. Qarzdorlik sababli yoqilgʻi yetkazib berishni faqat gaz taʼminoti tashkiloti ("Hududgaztaʼminot") toʻxtatishi mumkin.

Vazirlikda qoʻshimcha qilinishicha, uskunalarning sozligini tekshirish uchun fuqarolar oʻz xohishlariga koʻra "Hududgaztaʼminot" AJ boʻlinmalariga murojaat qilishlari mumkin. Xizmatlarga majburlash yoki tahdidlar yuzaga kelganda isteʼmolchilardan Energetika vazirligining ishonch telefoniga (+998 71 231-10-64), "Hududgaztaʼminot"ga (+998 71 202-11-04, 1104) qoʻngʻiroq qilish yoki ularning Telegram-botlari orqali murojaat yuborish soʻraladi.