Yoʻlovchi bojxona deklaratsiyasini YaIDXP orqali topshirishga ruxsat berildi

Xizmat saytdagi "Bojxona" boʻlimida, shuningdek, MyGov mobil ilovasida bepul asosda taqdim etiladi. Oʻzbekistonga kirib kelayotgan fuqarolar shaxsiy ehtiyojlari uchun moʻljallangan tovarlar, mobil qurilmalar, zargarlik buyumlari va valyuta boʻyicha elektron shaklni oldindan rasmiylashtirib, tayyor hujjatni telefonda saqlashlari hamda chegaradan oʻtishda uni bojxona xodimiga koʻrsatishlari mumkin.

Mobil telefonlar va aloqa apparatlari, bittadan ortiq olib kirilayotgan maishiy texnika va elektronika (televizorlar, noutbuklar, kir yuvish mashinalari, konditsionerlar), shuningdek, ogʻirligi 65 grammdan ortiq boʻlgan oltin taqinchoqlar va 200 grammdan ogʻir kumush buyumlar majburiy deklaratsiyalanishi lozim. Shuningdek, ekvivalenti 100 mln soʻmdan ortiq boʻlgan soʻm yoki xorijiy valyutadagi naqd pullar, qonunchilik meʼyorlariga muvofiq dori vositalari hamda qurol-yarogʻ, dronlar, radioelektronika va tarixiy-madaniy boyliklarni oʻz ichiga olgan alohida nazoratdagi tovarlarni deklaratsiyalash talab etiladi.

Shaxsiy foydalanish uchun bojsiz olib kirish meʼyorlari aviatashuvda 1000 dollargacha, temir yoʻl va daryo transportida 500 dollargacha, avtomobilda yoki piyoda kirishda esa 300 dollargachani tashkil qiladi. Ushbu meʼyorlardan oshib ketgan taqdirda bojxona toʻlovlari hisoblanadi.