Toshkent Botanika bogʻida sunʼiy suv havzasi tashkil etilmoqda

Bogʻ hududidagi yer ishlari ijtimoiy tarmoq foydalanuvchilarining xavotiriga sabab boʻldi. Oʻzbekiston Fanlar akademiyasining maʼlum qilishicha, suv havzasi ilmiy kolleksiyaga tegishli boʻlmagan bufer zonasida joylashtirilmoqda. Ushbu hududda qamish va maymunjon oʻsgan, kolleksiyaga oid daraxtlar esa u yerda mavjud emas. Bogʻning bosh dendrologi Atirgul Xolmirzayeva Gazeta.uz nashriga hech qanday daraxt kesilmaganini, hududdan faqat Oʻrmon xoʻjaligi ilmiy-tadqiqot instituti mutaxassislarini jalb qilgan holda daraxtlarning qurigan qismlari olib tashlanayotganini tushuntirdi.

Yunusobod tumani hokimligi maʼlumotlariga koʻra, koʻlning maydoni 0,5 gektarni, hajmi esa 10 ming kub metrni tashkil etadi. Loyiha, shuningdek, 1,2 km uzunlikdagi piyodalar va velosiped yoʻlagini barpo etish hamda qoʻshimcha 180 tup daraxt ekishni nazarda tutadi. Bosh dendrolog suv havzasiga suv oʻsimliklari, uning qirgʻoqlariga esa manzarali butalar ekilishini taʼkidladi. Qurilish ishlarini yil oxirigacha yakunlash rejalashtirilgan.