Prezident qiymati 50 mln dollardan boshlanadigan qurilish loyihalari uchun soliq imtiyozlari toʻgʻrisidagi farmonni imzoladi

Farmon ilovasida keltirilgan hududlarda «tartibga solish qumdoni» maxsus huquqiy rejimi joriy etiladi. Imtiyozlar «davlat — investitsiyaviy hamkor» tamoyili asosida beriladi. Bunday loyihalarni amalga oshiruvchi yuridik shaxslar investitsiyalar hajmi kamida 50 mln dollar boʻlgan loyihalarda foydalaniladigan obyektlar boʻyicha yer soligʻi va mol-mulk soligʻidan 20 yilga ozod qilinadi.

Loyiha obyektlarini sotish va ijaraga berishdan olinadigan foyda soligʻi 1 foizni tashkil etadi. Imtiyoz muddati toʻgʻridan toʻgʻri investitsiyalar hajmiga bogʻliq: 50 mln dollardan boshlansa — besh yil, 100 mln dollardan boshlansa — oʻn yil, 500 mln dollardan boshlansa — 15 yil. Bosh pudratchilar va bosh loyiha tashkilotlari Oʻzbekistonda faoliyat yuritmaydigan xorijiy jismoniy va yuridik shaxslarning xizmatlari uchun QQS toʻlamaydi. Bunday loyihalar boʻyicha investorlarning dividendlari, agar ushbu mablagʻlar Oʻzbekistonga qayta yoʻnaltirilsa, 2040-yil 1-yanvargacha soliqqa tortilmaydi.

Yangi Toshkentni barpo etish direksiyasining vakolatlari boshqa maxsus zonalar direksiyalariga ham tatbiq etiladi. Ular rejalashtirish hujjatlariga qoʻyiladigan talablarni, yer uchastkalarini realizatsiya qilishda qurilishning asosiy shartlarini va ayrim loyihalar uchun alohida texnik shartlarni mustaqil belgilashi mumkin boʻladi.

Choralarning bir qismi haqida prezident 12-oktabr kuni Yangi Toshkentda faoliyat yuritayotgan tadbirkorlar bilan uchrashuvda maʼlum qilgan edi: davlat investitsiyalar hajmi 50 mln dollardan ortiq boʻlgan noturarjoy obyektlarini «yashil» sertifikatlash xarajatlarini qoplab beradi, har bir yirik loyihaga masʼul vakil biriktiriladi, investorlar bilan esa tomonlarning majburiyatlari va imtiyozlar roʻyxati koʻrsatilgan individual bitimlar tuziladi.