Oʻzbekiston JST doirasida mobil telefonlar uchun nol stavkali bojni kelishib oldi

Hozirda smartfonlar va boshqa mobil telefonlar uchun import boji 5 foizni tashkil etadi. U Prezidentning 2018-yil 29-iyundagi qarori bilan belgilangan. Olimjonovning soʻzlariga koʻra, mamlakat JSTga aʼzo boʻlish boʻyicha muzokaralarning yakuniy bosqichini oʻtamoqda va shartlardan biri — tashkilotga aʼzo davlatlar bilan import bojlari stavkalarini kelishib olishdir. «JSTga kirishdan oldin bu stavka baribir nolga tushadi», — dedi u. Idora vakili oʻzgarishlar kuchga kirishining aniq muddatlari va sanasini aytmadi. Bojxona qoʻmitasida boj stavkalarini belgilashga ushbu idora vakolatli emasligini, bu bilan sohaviy vazirliklar shugʻullanishini ham aniqlashtirishdi.

Olimjonovning baholashicha, boj bekor qilinganidan keyin byudjetga tushumlar 300–400 mlrd soʻmga qisqaradi, xaridorlar uchun esa telefonlar deyarli 5 foizga arzonlashadi. Qurilmalarni olib kirishdagi QQS saqlanib qoladi, hozirda uning stavkasi 12 foizni tashkil etadi.

Bojxona qoʻmitasi maʼlumotlariga koʻra, 2026-yilning oʻn oyi davomida mamlakatga rasman 4,1 mln dona mobil qurilma olib kirilgan — bu oʻtgan yilgidan 1 mln donaga koʻp. Ularning importidan tushgan bojxona toʻlovlari 2,1 baravarga oshib, 2 trln soʻmga yetdi. Ushbu miqdordan 452 mingta qurilma Apple mahsulotlari hissasiga toʻgʻri keldi: bu byudjetga 756,6 mlrd soʻm daromad keltirdi, bu 2025-yilga nisbatan 6,2 baravarga koʻp.