Toshkent viloyati va Belarus 55 mln dollarlik qoʻshma loyihalarni muhokama qildi

Tashrif davomida Mirzayev Belarus Milliy majlisi Respublika kengashi raisi Natalya Kochanova bilan uchrashdi. Respublika kengashining Xalqaro ishlar va milliy xavfsizlik boʻyicha doimiy komissiyasiga rahbarlik qiluvchi Sergey Aleynik jurnalistlarga amalga oshirilayotgan qoʻshma loyihalar qiymati 55 mln dollarni tashkil etishini maʼlum qildi. U tashabbuslar qatorida Oʻzbekistonda sim mahsulotlari ishlab chiqarish, mis va parranda goʻshtini qayta ishlashni tilga oldi.

Aleynikning soʻzlariga koʻra, Brest viloyatida 10 ming bosh qoramolga moʻljallangan qoʻshma chorvachilik majmuasi qurilishi boshlangan. Kelgusida u yerda xomashyoni qayta ishlash va tayyor mahsulotni Oʻzbekistonga yetkazib berish rejalashtirilmoqda. Tomonlar, shuningdek, sanoat va qishloq xoʻjaligidagi loyihalarni, jumladan kartoshka va lavlagi yetishtirishni muhokama qildilar.

Mirzayev Belarus bilan birgalikda sanatoriy-sogʻlomlashtirish majmuasini tashkil etish hamda yogʻochni qayta ishlash sohasidagi hamkorlik haqida soʻzlab berdi. U sanoat, mashinasozlik va mebel ishlab chiqarishda yangi rejalar ishlab chiqilganini, shuningdek, Oʻzbekistonda yangi farmatsevtika zavodi qurilishi rejalashtirilganini qoʻshimcha qildi.

Suhbat chogʻida 2030-yilga borib ikki mamlakat oʻrtasidagi oʻzaro tovar ayirboshlash hajmi 2 mlrd dollarga yetishi kutilayotgani bildirildi. Aleynik, shuningdek, joriy yilda Shavkat Mirziyoyevning Belarusga rasmiy tashrifi chogʻida boʻlib oʻtgan III Hududlar forumida 40 dan ortiq kelishuv imzolanganini eslatib oʻtdi.