Hisob palatasi 2026-yilda 10,2 trln soʻmlik davlat xaridlarida qoidabuzarliklarni aniqladi

Toʻqqiz oy davomida palata jami 84 ta auditorlik tadbirini oʻtkazdi, ulardan 46 tasi masofaviy tarzda amalga oshirildi. Byudjetning xarajatlar qismida 2 trln soʻmlik moliyaviy qoidabuzarliklar aniqlandi, ushbu summadan 250,2 mlrd soʻmi byudjetga qaytarildi. Bundan tashqari, palata maʼlumotlariga koʻra, xarajatlarni 4,2 trln soʻmga maqbullashtirishga erishildi, 23,6 mlrd soʻmlik noqonuniy xarajatlarning esa oldi olindi.

4,8 trln soʻmlik materiallar huquqiy baho berish uchun huquqni muhofaza qiluvchi organlarga yuborildi. 222,3 mlrd soʻmlik qoidabuzarliklar boʻyicha mansabdor shaxslar maʼmuriy javobgarlikka tortildi. Daromadlar qismida auditorlar 1,6 trln soʻmlik soliqlar va majburiy toʻlovlarning qoʻshimcha manbalarini aniqladi, shundan 656,3 mlrd soʻmi byudjetga undirildi.

Palataning Masofaviy nazorat markazi xuddi shu davrda 17,1 trln soʻmlik qoidabuzarliklarni bartaraf etdi va yana 90 mlrd soʻmlik qoidabuzarliklarga yoʻl qoʻymadi. «Masofaviy audit» tizimida beshta yoʻnalish boʻyicha sunʼiy intellekt qoʻllanilmoqda, uning yordamida 115 mlrd soʻmlik qoidabuzarliklar aniqlandi. Shuningdek, palata davlat byudjeti va maqsadli davlat jamgʻarmalarining 2026-yil yanvar–iyun oylaridagi ijrosi toʻgʻrisidagi hisobotning tashqi auditini oʻtkazdi.

Tizimli muammolarni bartaraf etish maqsadida idora 20 ta normativ-huquqiy hujjat loyihasini tayyorlashni taklif qildi; ulardan toʻrttasi qabul qilindi, qolganlari esa kelishilmoqda. Sentabr oyi boshidan buyon Hisob palatasiga Alisher Samadov rahbarlik qilmoqda.